မင်္ဂလာပါရှင်.. ဒီဘလောဂ်လေးကို ၂၀၀၆ သြဂုတ်လမှာ စတင်ရေးခဲ့ပါတယ်။ အခုတော့ အိမ့်ချမ်းမြေ့ဒေါ့ကွန်းမှာ စာတွေ ဆက်ရေးနေကြောင်းပါ...။
လာလည်သော လူနည်းစု မောင်နှမများကို ကျေးဇူးတင်ပါတယ်ရှင်။

Friday, March 30, 2007

ကိုစိုးဇေယျသို့ပေးစာ

မနှစ်က Okanagan (အိုကာနာဂန်) ဆိုတဲ့ ဒေသခရီးကအပြန် ခရီးသွားဆောင်းပါးလေးတပုဒ် ကျွန်မရေးဖြစ်ခဲ့တယ်။ ဆောင်းပါးကိုဖတ်ပြီး မေးခွန်းအချို့မေးလာတဲ့ ကိုစိုးဇေယျ
အတွက် တတ်သမျှ မှတ်သမျှဝေမျှလိုက်ပါတယ်။

Okanagan (အိုကာနာဂန်) ဆိုတဲ့ဒေသက ကနေဒါနိုင်ငံ အနောက်ဘက်ဆုံးက British Columbia (ဗြိတိသျှကိုလံဘီယာ) လို့ခေါ်တဲ့ ပြည်နယ်ထဲမှာ ရှိတယ်။ ဒေသခံ လူဦးရေကတော့ သုံးသိန်းပတ်ဝန်းကျင်လောက်ရှိတယ်။ အဖြူတွေ၊ ပင်စင်စားတွေ နေတာများတယ်။ အိုကာနာဂန်ဒေသက ယူအက်စ် ၀ါရှင်တန်စတိတ်ရဲ့ အပေါ်ဘက် တည့်တည့်မှာရှိတယ်။

မြို့တော်ကတော့ Kelowna (ကလိုးနား) မြို့ဖြစ်တယ်။
မြန်မာပြည်အနေနဲ့ဆိုရင်တော့ အင်းလေးလို မြို့ပါ။ ၀ိုင်တွေအလျှံပယ်ထွက်တဲ့ မြို့ဖြစ်တဲ့အပြင် လှပပူနွေးတဲ့ ဧရာမ ရေကန်ပြာကြီးတွေရှိတဲ့နေရာ၊ တောင်တက်၊ စကီးစီးလို့လဲရတဲ့ဒေသ၊ ရာသီဥတုကလဲ တော်တော်ပူနွေးတဲ့နေရာမို့လို့ မြောက်အမေရိကတိုက်မှာတော့ လူတွေပြောင်းရွှေ့နေထိုင်မှု အမြင့်ဆုံးမြို့လို့ ဆိုပါတယ်။ အိမ်ဈေးတွေကလဲ ကနေဒါနိုင်ငံမှာ ဒုတိယအမြင့်ဆုံးမြို့လို့ဆိုပါတယ်။
Kelowna (ကလိုးနား)မြို့မှာတော့ လူဦးရေက တစ်သိန်းကျော်ကျော်ပဲရှိတယ်။

ကလိုးနားကို ကမ္ဘာလှည့်ခရီးသည်တွေ သွားရောက်လည်ပတ်ကြတာထက် ဗင်ကူးဗားနဲ့ အနီးအနားမြို့တွေက နယ်ခံလူတွေ နွေရာသီမှာ သွားကြတာ ပိုများတယ်။ နွေးထွေးလှတဲ့ ဧရာမ ရေကန်ကြီးတွေထဲမှာ တနေကုန်စိမ်နေလို့ရတယ်။ ဗင်ကူးဗားမြို့ကတော့ ပစိဖိတ်နဲ့ကပ်နေတော့ နွေရာသီလဲ အေးစက်တဲ့ပင်လယ်ရေထဲ ဆင်းဖို့သိပ်မလွယ်ဘူး။ ကလိုးနားမြို့ကို ကား သို့မဟုတ် လေယာဉ်ပျံနဲ့သွားလို့ရတယ်။ ကလိုးနားမြို့လေဆိပ်က Calgary, Edmonton, Toronto, Vancouver, Victoria အပြင် U.S. မြို့တွေဖြစ်တဲ့ Las Vegas, Honolulu, Seattle မြို့တွေနဲ့ မက္ကစီကိုထိ လေယာဉ် မှန်မှန်ပြေးဆွဲပါတယ်။

ကျွန်မတို့ အိုကာနာဂန်ကို ခရီးထွက်စဉ်က ပထမတစ်ရက်မှာ မှားပြီး တနေရာကိုရောက်သွားပါတယ်။ ကိုစိုးဇေယျက အဲဒီနေရာအကြောင်း အကျယ်တ၀င့်မေးထားတယ်။ ဘာကြောင့် အဲဒီနေရာက မှုန်ကုပ်ကုပ်နဲ့ အနားကရေကန်က မသန့်ရှင်းရတာလဲ၊ ဘယ်လောက်မသန့်ရှင်းတာလဲလို့ မေးပါတယ်။

တိတိကျကျမေးတော့လဲ တိတိကျကျပြောရတော့မယ့် အခြေအနေမှာ ရှိနေပါတယ်။ ကျွန်မတို့ ပထမ မှားပြီး ရောက်သွားတဲ့နေရာကတော့ ခွေးကျောင်းတဲ့နေရာပဲ ကိုစိုးဇေယျရေ….
ခွေးတွေနဲ့ အပျော်ခရီးထွက်လာသူတွေ သူတို့ခွေးတွေနဲ့ပါ တည်းခိုနိုင်တဲ့ မိုတယ်တစ်ခုမှာ သွားတည်းမိကြတာပါ။ ကျွန်မမောင်အချို့တောင် ခွေးတွေအတွက် သေသေချာချာခင်းထားတဲ့ ခွေးအိပ်ရာပေါ်မှာ တက်အိပ်မိကြပါသေးတယ်။ တမူထူးခြားတဲ့ အိပ်ရာခင်းအရောင်၊ သာမန်ထက်မာတဲ့ အိပ်ရာကြောင့် လူအိပ်ရာမဟုတ်မှန်း သူတို့အချိန်မှီ ရိပ်မိလိုက်ကြတယ်..(လို့ထင်ပါတယ်)။

ဒါကြောင့်လဲ အဲဒီနေရာက မှုန်ကုပ်ကုပ်၊ အိုးခွက်တွေက မသစ်လွင်၊ အနားကရေကန်က မသန့်ရှင်းတာပါ။ ရေကန်စပ် မသန့်ရှင်းရတဲ့ အကြောင်းကတော့ ကန်စပ်မှာ ဘဲ နဲ့ ငန်းတွေရဲ့ ကိစ္စများမှုတွေကြောင့်ပါ။ ရေဆင်းကူးဖို့ဝေး၊ ခြေတောင်ချလို့မရတဲ့ အခြေအနေပါ။ ဒီမှာတော့ ခွေးပိုင်ရှင်တွေက သူတို့ခွေးတွေရဲ့ ကိစ္စကို သူတို့ကိုယ်တိုင်ရှင်းပါတယ်။ လမ်းပေါ်မှာ ကျန်ခဲ့တာတွေ ဘာတွေ မရှိပေမယ့် သဘာဝ ရေဘဲလေးတွေရဲ့ခြေရာတွေကတော့ ကမ်းစပ်မှာ အနှံ့ပဲမြင်တွေ့နိုင်ပါတယ်။

ဒီလို ခရီးတွေကတော့ ကနေဒါမှာတော်ရုံလူလဲသွားနိုင်ပါတယ်။ ချမ်းသာစရာမလိုပါဘူး။ လူအုပ်များရင် ပိုကိုက်တာပေါ့။ အားလုံးမျှထည့်လိုက်ကြတာပါပဲ။ ကားတစ်စင်းပိုင်ရင် ကနေဒါတစ်နိုင်ငံလုံး ကားနဲ့ ပတ်မောင်းတောင်ရတယ်။ ဓာတ်ဆီဖိုးပဲလိုတာပါ။ ကိုယ်သွားမယ့်မြို့မှာ အသိ၊ ဆွေမျိုး၊ သူငယ်ချင်းရှိတယ်ဆိုလဲ ရင်းနှီးမှုပေါ်မူတည်ပြီး တည်းခိုခ သက်သာနိုင်ပါတယ်။




ကနေဒါရဲ့ ရုံးပိတ်ရက်တွေကတော့ January နှစ်သစ်ကူးနေ့၊ April လထဲမှာ အီစတာ (ဘုရားပွဲ)၊ မေလထဲမှာ ၀ိတိုရိယနေ့ (အဲဒီကိစ္စကို ဒီကလူတွေ အငြင်းပွားနေတာကြာပြီ၊ အင်္ဂလန်နိုင်ငံက ဘုရင်စနစ်ကို ဦးမတိုက်ချင်တော့လို့တဲ့)၊ ဇူလိုင်လထဲက ကနေဒါနေ့၊ စက်တင်ဘာလထဲက အလုပ်သမားများနေ့၊ အောက်တိုဘာလထဲက ကျေးဇူးတော်နေ့ (ကောက်ရိတ်သိမ်းပွဲ)၊ နိုဝင်ဘာလထဲက remembrance day - စစ်ကြီးထဲမှာ အသက်ပေးခဲ့သူတွေကို ဂုဏ်ပြုတဲ့နေ့၊ ဒီဇင်ဘာလထဲမှာ ခရစ်တော်မွေးနေ့နဲ့၊ boxing day ပဲဖြစ်ပါတယ်။ (boxing day လို့ခေါ်တဲ့အကြောင်းကတော့ လက်ဆောင်ပစ္စည်းဗူးတွေ ပလုံးတွေကို ပြန်သိမ်းကြတဲ့နေ့မို့လို့ပါပဲ)။




ဒီပြည်နယ်မှာတော့ သွားစရာတွေ အလွန်များပါတယ်။ ဘီစီရဲ့ မြို့တော်တည်ရှိရာ ဗစ်တိုးရီးယားမြို့ကတော့ ဗင်ကူးဗားကျွန်းပေါ်မှာတည်ရှိပါတယ်။ အဲဒီကျွန်းပေါ်က Buchard ပန်းခြံက ကမ္ဘာမှာ နာမည်တော်တော်ကြီးပါတယ်။ ဂျပန်ကမ္ဘာလှည့်တွေ သိပ်ကြိုက်တဲ့မြို့ပါ။ Whistler ဆိုတဲ့စကီးတောင်၊ စတင်လီပန်းခြံ စသဖြင့် ကမ္ဘာလှည့်တွေနဲ့ နာမည်ကြီးစည်ကားတယ်။ ဒေသခံတွေကတော့ ပြည်နယ်တစ်ခုလုံး နေရာအနှံ့သွားကြတာပါပဲ။ ရေပူစမ်းရှိတဲ့ Harrison Hot Springs စသဖြင့် နေရာမျိုးစုံပါပဲ။ ဘီစီထဲမှာ ကျွန်မခန့်မှန်းခြေအရ အင်းလေးလိုရေကန်မျိုးတွေ ရာနဲ့ချီ ရှိနိုင်တယ်။ ဘာဖြစ်လို့လဲဆိုတော့ ဘီစီပြည်နယ်တစ်ခုထဲတင် အကျယ်အ၀န်းက ၉၄၄၇၃၅ ကီလိုမီတာရှိပါတယ်။ ပြင်သစ်၊ ဂျာမဏီနဲ့ နယ်သာလန် သုံးနိုင်ငံ ပေါင်းထားသလောက်ရှိပါတယ်။ ဒါကြောင့်သွားစရာတွေက မကုန်နိုင်အောင်များပါတယ်။




(မြို့လူဦးရေ၊အကျယ်အ၀န်းများ နှင့် လေယာဉ်ခရီးစဉ်များကို Wikipedia မှ မှီငြမ်းပါသည်။)

♥အိမ့်ချမ်းမြေ့♥

No comments:

LinkWithin

Related Posts Plugin for WordPress, Blogger...